Mwili wa hayati Yasser Arafat wafukuliwa ili kufanyiwa uchunguzi wa Kitabibu

Moja ya picha za Hayati Yasser Arafat wakati wa uhai wake

Mwili wa kiongozi wa zamani wa Palestina, Yasser Arafat, umefukuliwa kutoka kaburi lake liloko ukingo wa Magharibi mjini Rammallah ili kuwawezesha madaktari kuufanyia uchunguzi wa kina kubaini iwapo aliuwawa kwa sumu au la.

Bwana Arafat alifariki dunia mwaka 2004 nchini Ufaransa katika hospitali moja ya kijeshi alikokuwa akipata matibabu baada ya kuugua kwa kipindi kifupi.

Maradhi yaliyopelekea kifo chake hayakubainika na hivyo kutia shaka juu ya kifo chake!.Uamuzi wa kuufukua mwili wa Yasser Arafat katika kaburi lake lililoko ukingo wa Magharibi unafuatia makala ya televisheni iliyodai kupata mabaki ya madini ya kitonoradi aina ya Polonium kwenye nguo zake.

Wapalestina wengi wanashuku kwamba huenda Israel ilihusika katika kifo cha kiongozi huyo. Israel imekuwa ikikanusha shutuma hizo.

Uchunguzi wa mauaji dhidi ya Bwana Arafat umeanzishwa nchini ufaransa kufuatia ombi lililowasilishwa na mjane wake.